Haend eus zerscht 2 tag erhole muese vo daere angstifloessende hireis nach rurrenabaque. wunderschoen da!!! haend e 3 taegigi dschungeltour buecht. sind zerscht uf em rio beni 5 stund lang mit em long tail boat de fluss duruf gschiffet worde. unterwaegs haemer immer wieder schildkroete gseh uf de baumstaemm suennele, kaimane sind am uferrand glaege und unzaehligi farbigi schmaetterling sind umegfloge. nach akunft simer i euses camp, wo mir di erscht uebernachtig gha haend, gloffe. das camp haet so usgaeh... jede vo eus haet es sidevorhaengli uebercho, das amene ast abunde und somit haet jede sis himmelbett gha zum drunder ligge :-). euse choch haet sich daenn grad is zueg gleit und mir haend i daere ziit euses glueck versuecht mit piranhas fische... sind gar noed so schlaecht gsi... 3 piranhas und 5 sardine haemer us em gwaesser zoge... und frittiert zum znacht uebercho... fleisch haets nuem viel dra gha... keis wunder... die iheimische haend au lieber knakigi choepf zum aesse als s´feine fleisch :-) aber mir haend noed muese hungere... es haet riiichlich z´aesse geh!!! bi nachtibruch simer mit de taschelampe nach tier go sueche. haend affe, schlange, diversi spinne und insekte gsichtet. zrug im camp haets ae traditionells indianer-ritual geh zum die boese geister z´vertriibe. fuer das haets fuer alli wii und cocablaetter geh ;o). am zweite tag haemer eus ueber di diverse pflanze und baeum und daere ihri wuerkig belehre la. mega spannend gsi. haend eus doerfe schmuck mache mit saelber gfundene minikokosnuess. nach daere bastelstund simer scho wieder bim fische glandet. dasmal isches um groesseri catfish gange... au die haemer samt graete und chopf am abig i de suppe gha... na ja... euse gschmack haends noed so troffe. haend daenn no ae vogelspinne i ihrem dihei ufgsuecht. riisig gsi!!! am 3te tag haemer nomal ae chlini tour im dschungel gmacht und daenn isches au scho wieder ziit gsi zum retour nach rurrenabaque zfahre.